Goar monches Joahr ies seitdam verganga,
wu ich mußte aus der Häämte ziehn.
Vieles, o dam mei Hazze hoot gehanga,
ies ei der Grofschoaft Glotz geblien.
Woas ich mitgenumma hoa vo drieba,
ies ei mir drenne a lebendich Beld;
ei doas is olles neigeschrieba,
woas mei sehnliches Verlanga stellt.
Ofte, wenn ich meine Aaga schlisse,
hoa ich olles verr mir sonnakloar:
die Menscha, Därfer, Barge, Flisse;
halt olles, wie es dozumol noch woar.
Asu koan a beßla Trost ich fenda:
ich spier, wu ich verworzelt bien.
Aach dann watt die Häämte Kroaft mir spenda,
wenn se änzich ols Erenn'rung ies geblien.
(Hermann Günzel)